ប្រែសម្រួល៖សហការី

វាមាន “សារៈសំខាន់” សម្រាប់អ៊ុយក្រែន ក្នុងការទទួលបានការគាំទ្រពីប្រធានាធិបតីសហរដ្ឋអាមេរិក ដូណាល់ ត្រាំ ដូចដែលប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី បានថ្លែងនៅថ្ងៃសៅរ៍ មួយថ្ងៃបន្ទាប់ពីលោកត្រូវបានស្តីបន្ទោសដោយមេដឹកនាំអាមេរិក ក្នុងកិច្ចប្រជុំដ៏តានតឹងនៅការិយាល័យអូវ៉ាល់។

“វាមានសារៈសំខាន់ណាស់សម្រាប់យើង ក្នុងការទទួលបានការគាំទ្រពីប្រធានាធិបតី Trump” លោក Zelensky បាននិយាយក្នុងសារជាបន្តបន្ទាប់នៅលើបណ្តាញ X នៅព្រឹកថ្ងៃសៅរ៍។ “លោកចង់បញ្ចប់សង្គ្រាម ប៉ុន្តែគ្មាននរណាម្នាក់ចង់បានសន្តិភាពជាងយើងនោះទេ។”

លោក Zelensky បានសង្កត់ធ្ងន់លើការដឹងគុណរបស់លោកចំពោះការគាំទ្ររបស់សហរដ្ឋអាមេរិកចំពោះអ៊ុយក្រែន ក្នុងរយៈពេលបីឆ្នាំ ចាប់តាំងពីរុស្ស៊ីបានឈ្លានពានប្រទេសរបស់លោក។ ក្នុងការជជែកគ្នាយ៉ាងក្តៅគគុកកាលពីថ្ងៃសុក្រ អនុប្រធានាធិបតីសហរដ្ឋអាមេរិក JD Vance បានសួរថាតើមេដឹកនាំអ៊ុយក្រែនមានការដឹងគុណគ្រប់គ្រាន់ចំពោះការគាំទ្ររបស់សហរដ្ឋអាមេរិកឬអត់។

“យើងមានការដឹងគុណយ៉ាងខ្លាំងចំពោះសហរដ្ឋអាមេរិក សម្រាប់ការគាំទ្រទាំងអស់។ ខ្ញុំសូមថ្លែងអំណរគុណដល់ប្រធានាធិបតី Trump សភា សម្រាប់ការគាំទ្រពីរគណបក្សរបស់ពួកគេ និងប្រជាជនអាមេរិក។ ជនជាតិអ៊ុយក្រែនតែងតែកោតសរសើរចំពោះការគាំទ្រនេះ ជាពិសេសក្នុងរយៈពេលបីឆ្នាំនៃការឈ្លានពានពេញលេញនេះ” លោក Zelensky បានបញ្ជាក់ឡើងវិញក្នុងសាររបស់លោកនៅលើបណ្តាញសង្គម។

មេដឹកនាំអ៊ុយក្រែនបានសង្កត់ធ្ងន់ថា ទោះបីជាមានការប៉ះទង្គិចគ្នាកាលពីថ្ងៃសុក្រក៏ដោយ អ៊ុយក្រែន និងសហរដ្ឋអាមេរិក “នៅតែជាដៃគូយុទ្ធសាស្ត្រ។ ប៉ុន្តែយើងត្រូវមានភាពស្មោះត្រង់ និងត្រង់ទៅត្រង់មកជាមួយគ្នា ដើម្បីយល់ឱ្យបានពិតប្រាកដនូវគោលដៅរួមរបស់យើង។”

លោកបាននិយាយថា អ៊ុយក្រែនរួចរាល់ហើយក្នុងការចុះហត្ថលេខាលើកិច្ចព្រមព្រៀងរ៉ែ ដែលលោកបានធ្វើដំណើរទៅសហរដ្ឋអាមេរិកដើម្បីចរចា ប៉ុន្តែលោកបានកត់សម្គាល់ថា “វាមិនគ្រប់គ្រាន់ទេ”។

“យើងត្រូវការច្រើនជាងនេះទៅទៀត។ ការឈប់បាញ់គ្នាដោយគ្មានការធានាសន្តិសុខ គឺគ្រោះថ្នាក់សម្រាប់អ៊ុយក្រែន។ យើងបានប្រយុទ្ធអស់រយៈពេលបីឆ្នាំហើយ ហើយប្រជាជនអ៊ុយក្រែនត្រូវការដឹងថា អាមេរិកនៅខាងយើង” លោក Zelensky បាននិយាយ។

“ប្រជាជនអាមេរិកបានជួយសង្គ្រោះប្រជាជនយើង។ មនុស្ស និងសិទ្ធិមនុស្សគឺជាអាទិភាពទីមួយ។ យើងពិតជាដឹងគុណណាស់។ យើងចង់បានតែទំនាក់ទំនងដ៏រឹងមាំជាមួយអាមេរិកប៉ុណ្ណោះ ហើយខ្ញុំពិតជាសង្ឃឹមថា យើងនឹងមានទំនាក់ទំនងបែបនេះ” លោកបានបន្ថែម៕

ប្រភព៖ CNN